الشعر المرحوم :الحاج أمحمد سليماني
الأبيض سيدي الشيخ يوم:1997/02/01
أتفجأت اليوم وأنيا نقرا***في الشروق أقريت لدشرة عنوان
أتأسفت وقلت أنا واش صرى ***أوصح البيض غير دشرة في البنيان
فتشت التاريخ وأسهرت البكرة***صبت الوزن اختل وافقد الميزان
وأعرفت الشاعر مصدوم بقهرة***وقال كلام أركيك وامزج الألوان
ما فرق لا بين بيضاء ولا سمرة***وخلط كلش كان غاضب وزعفان
ما حددش شكونهم ناس الحقرة***واوصف الجميع ركب من الخيان
لقلوقي تلقاه عاجل في الهدرة***ويسبق في العيب من زلة لسان
مايصبرش وما يقدش للغمرة***مثل اللي صبرولها قساو امحان
ياسر من اللي ابكاو منها بالكثرة***مثل الغصن اللي يبس من غير اوان
ياسر من قساو بالكيل المرة***ذاقو من مرارته ذاك القطران
والقاو البشر مثله كالسدرة***ما تدي من خيرها نبقة تتلان
لكنهم للمحاين صبارة***وحب أوطنهم زادهم في القلب ايمان
كذا من لي تحاوزوه النكارة***وبالإرادة نال حقه في الميدان
ما يستسلم ما يخاف الحقارة**كاين رجال شقهم تخدم لوطان
لكنك يا صاحبي غي من عثرة***أنسيت حبابك كلشي درته خيان
أنسيت بلادك زدت واصفها حفرة***وياك البيض عشتها وسط الصبيان
اختلفت معاك في هذه الفكرة***في ناسك تذم وبذمك فرحان
ذيك أبلادك لو فضلت الهجرة ***ما تشمتها عار عنك بالرعيان
ما تنساش تعود ليها ذا الدشرة***اللي شافت في قصيدتك غير النكران
قدوة واش أتقول لناس المقبرة***حين أتعود أهنا ملمد في لكفان
كيمهاك أتعود عند الشفارة***ناس البيض ياك منهم الدفان
تتمناهم يجوك من كل حارة***بالرحمة يدعوا لربي والغفران
ولايذكروك بالشر أخسارة***وانتيا سفيرهم عند الرحمن
حسب كلا مك كلنا غي غدارة***واشمايت نعطو الرشوة بالخرفان
ما إحترمت أشياخ أقطاب الصحراء***وفي قصيدة أقرنتهم بالحيوان
ما إحترمت أكبار واصحاب الشورى***ماحترمت امقادم ازوي والقران
ما احترمت قبايل نالت شهرة***ما قلتش ذا عيب أنذم الفرسان
مااحترمت الجود وأخصايل كبرى***وتاريخ الجبهة المعروف البرهان
مااحترمت الشيخ والقبة الخضراء***سيد الحاج بحوص ظاهر للعيان
ما احترمت شريف لا خادم حرة***لا بو بكري لا زيادي لا عمران
لا عيساوي لا أرزيقي من برة***لا حضاري ساكن معاهم جيران
لا موال أهديت لابايع خضرة***لا كسابة للرخايل والخرفان
لا فلاحة لا أصحاب التجارة***لا سيدي طيفور لا ناس الحرشان
لا قروجي لا أغواطي للنعرة***لا بن سيد الحاج قدامك يبان
لا أهل ستيتن لا ناس الحضرة***لا زاوي ولا أزواوي من السكان
لا رحماني لا أمشارة لا لعشرة***لا صاحب من أولاد مومن لا خلان
لا أولاد نايل جايين أهنا قفرة***عرفوا فينا الصدق والكرم والإحسان
قصدوا هاذ البر جاوه دوارة***وعرفوا تحت جناحنا يلقوا لمان
أسألهم يعطوك بدون فخارة***عشرة جيهتنا معاهم ياك تبان
كان أحنيا كالكلاب الغدارة***حشى كان عروشنا كلش خيان
خلطت كل الناس داخل شكارة***ما أعرفت واش تقول وأنتيا زعفان
قلت المشوي والمصاور والقصرة***زيد أجماعة على الصوانة والكيسان
والضيف أنودوه بالحليب والتمرة***ياك هاذي عادتنا من وقت زمان
أنيا نوصيك ونعطيك دبارة***الراجل لي صبر في الشدة بان
الزعيم من قاوم الناس قجارة***ما يهربش وما يخويش المكان
يعترف بالواقع يعيش امراره***ويتفائل بالخير يناله فرحان
ما يتعجل ما يولي كالشارة***ما يرموه الناس من كل البيبان
ما يقولوش عليه به الدفارة***ويستشمت في بلدته عز البلدان
عيب على من اشكر أول مرة***وبعد الشكر يذم ويعاير عربان
أنسى فيها أرجال من أهل النعرة***من بكري تاريخهم ظاهر ويبان
أنسى فيها أصحاب عز ومفخرة***واقبايل اكبار ما ترضى تتهان
يظهر ليا غلطت في هاذ النظرة***اللي راك أنظرتها لأرض الشجعان
فتش في التاريخ تبع الجرة***واتذكر ايامها من وقت الرومان
من الموقومات حتى للثورة***أسرد التاريخ بدون نكران
اذا كان الغصن يابس في الشجرة***يقطع غير الغصن ما هوش لغصان
أجملت أجميع القبايل في ذالحفرة***وشينت أقلوبنا في ذا رمضان
زايد قلت قصيدتك غي بالسترة***واخفيت أسمك واش أنتيا جبان
وأدفعت الناس يتهمو في الشعراء***صرنا مجبورين ندلي بالبرهان
في شهر الصيام ثارت غبارة***وانتشرت اخبارها في كل أمكان
الحق أنقولوه بكل شطارة***نفتخر بدشورنا ولو كيفان
أرضي وبلادي وناسي مفخرة***أهل الجيهة الشكر ليهم والعرفان
أنعاشرهم وما أنجاورش أنصارة***نبقى فيهم ذو إخوتي في الإيمان
مهما كان الحال نحنا صبارة***ونتمناو الخير لجميع السكان
نهديها للكل بالراجل وامرة***ناس البيض من أصحابي للجيران
الشاعر محب جار من الجورى***ما يرضى للجار في قرية يتهان
يبق البيض فيه كي يضرب دورة***يتلقاه الكل ما بين الأحضان
وما يبقيش عليه يبخس في الصورة***وهو ولايته فيها قطان
بالجود والإحسان هي مشهورة***والضيفة بالسفوف وجناب الخرفان
وتعرفها بذا الخصايل مذكورة***خلوها سداتنا من وقت أزمان
راني انوعي فيك ها خذ العبرة***حب الوطن ذاك من صدق الإيمان
اسم الشاعر إذا أنت باقي تقرا***حرف السين وزيدها كلمة ليمان
النيف إلا ما ينيف تديه حدورة***واللي ماله نيف ما هوش إنسان
والصلاة على اللي جاء بالبشرى***محمد رسولنا طه العذبان
ألف صلاة عليه دايم بالبكرى***خير الخلق لي أكرمنا بالإيمان
